Тошкент ва Фарғонада нафақадаги ички ишлар ходимлари профилактик ишга қайтарилиши мумкин

Тошкент ва Фарғона вилоятларида криминоген вазият мураккаб бўлган айрим маҳаллаларда ҳуқуқбузарликларнинг олдини олиш бўйича чора-тадбирлар кучайтирилмоқда. Шу мақсадда, ички ишлар органларида фаолият юритган ва ҳозирда нафақада бўлган тажрибали фуқароларни профилактика ишлари учун жалб этиш таклиф этилмоқда.

 

Ҳозирда бу борадаги тегишли меъёрий ҳужжат лойиҳаси муҳокамада бўлиб, июль ойининг охиригача жамоатчилик фикрини ўрганиш режалаштирилган. Ҳужжатга кўра, камида беш йиллик хизмат стажига эга бўлган, обрў-эътибор қозонган собиқ ички ишлар ходимлари шартнома асосида профилактика маслаҳатчиси сифатида фаолиятни қайта бошлаши мумкин бўлади.

 

Танлов асосида амалга ошириладиган ушбу ташаббусда барча ижтимоий қатламларга мансуб нафақахўрлар — жинси, ёши, дини ва мулкий ҳолатидан қатъи назар — иштирок этиши мумкин. Номзодлар белгиланган босқичлар асосида танлаб олинади: ариза топшириш, ҳужжатларни ўрганиш, суҳбат ўтказиш ва якуний натижаларни эълон қилиш.

 

Маслаҳатчилар фаолияти энг муаммоли ҳудудларда ташкил этилади. Ушбу ҳудудлар рўйхати Ички ишлар вазирлиги томонидан ҳар йили янгилаб борилади. Номзодларнинг маҳаллий шароитни яхши билиши, аҳолига ёндашуви, мулоқот маданияти ва илгари тўплаган хизмат тажрибаси алоҳида эътиборга олинади.

 

Уларнинг хизматлари учун маблағлар ҳуқуқбузарликлар профилактикаси тизимини ривожлантириш жамғармаси ҳисобидан ажратилиши назарда тутилган. Шу билан бирга, хизматга жалб этилган пенсионерларга амалдаги пенсиясининг 100 фоизи миқдорида қўшимча тўлов белгиланиши режалаштирилмоқда.