Ислом цивилизацияси маркази: Президент ташаббусидаги буюк лойиҳа якунига етмоқда

Президент ташаббуси ва ғояси асосида барпо этилаётган Ислом цивилизацияси маркази қурилиши якуний босқичга етиб келди. Ушбу муҳташам мажмуа нафақат Ўзбекистонда, балки бутун мусулмон оламидаги энг йирик илмий-маърифий марказлардан бирига айланиши кутилмоқда. Ҳозирда бино қурилиши ва ички пардозлаш ишлари деярли якунланган бўлиб, марказ экспозицияси ва контент билан бойитилмоқда.

 

Марказ таркибини бойитиш борасида оммавий ахборот воситалари ҳам фаол иштирок этмоқда. Жумладан, «Sevimli» телеканали ташаббуси билан 25 та тарихий обиданинг макети яратилмоқда ва марказга беғараз ҳадя қилинади.

 

 

Телеканал директори Жалолиддин Сафоевнинг сўзларига кўра, макетлар устида иш жорий йилнинг апрель ойида бошланган ва улар тўлиқ тарихий асос, илмий маслаҳатлар ва меъморий услублар асосида тайёрланмоқда.

 

“Президентимиз ғоясини амалга оширишда ўз ҳиссамизни қўшиш биз учун шараф. Макетлар устида катта жамоа билан ишлаяпмиз, уларда нафақат кўриниш, балки илмий ва маънавий мазмун ҳам мужассам бўлади,” — дейди Сафоев.

 

 

Марказ экспозициясининг ажралмас қисми сифатида 59 та макет яратилиши режалаштирилган бўлиб, уларнинг 24 таси замонавий 3Д форматда тақдим этилади. Ҳар бир макет тарихий далиллар ва илмий асослар билан ишлаб чиқилмоқда. Уларнинг барчаси юқори аниқлик, мукаммал безаклар ва ишончли архитектура билан ажралиб туради.

 

 

Маълумот учун: ҳозирда марказ биносида қурилиш ва ички пардоз ишлари деярли якунланган. Айни дамда асосий эътибор — экспозиция ва контент билан бойитиш ишларига қаратилган. Мазкур улкан лойиҳа устида Ўзбекистон ва хориждан жалб қилинган 2000 га яқин олим, мутахассис, дизайнер, архитектор ва ҳунарманд фаолият юритмоқда.

 

Марказ доирасида 800 дан ортиқ лойиҳа устида иш олиб борилмоқда. Улардан 400 га яқин лойиҳа Президент томонидан илгари сурилган “Цивилизациялар, шахслар, кашфиётлар” концепцияси асосида шакллантирилмоқда.