2026 йилда Бутунжаҳон ҳожатхоналар ташкилоти саммити Ўзбекистонда ўтказилиши кутилмоқда
Бутунжаҳон ҳожатхоналар ташкилоти раҳбари Ўзбекистон билан ҳамкорликка тайёрлигини билдирди.
Бутунжаҳон ҳожатхоналар ташкилоти (World Toilet Organization) асосчиси ва директори Жек Сим Ўзбекистонга ташриф буюрди. Ташрифдан кўзланган асосий мақсад — мамлакатдаги санитария инфратузилмасини ривожлантиришга кўмаклашиш, гигиена меъёрларини оммалаштириш ва халқаро тажриба алмашишдан иборат.
Ташриф давомида делегация Тошкент, Самарқанд ва Бухоро вилоятлари, шунингдек, Тошкент шаҳрида жойлашган ЮНЕСКОнинг Бутунжаҳон мероси объектлари, сайёҳлик масканлари ва аҳоли гавжум жойлардаги жамоат ҳожатхоналари ҳолатини ўрганди.
Жек Сим таълим муассасалари ва сайёҳлар гавжум жойларда замонавий, хавфсиз ва инклюзив ҳожатхоналарни лойиҳалаштиришга алоҳида эътибор қаратиш зарурлигини таъкидлади. Унинг фикрича, санитария инфратузилмаси барча тоифадаги фойдаланувчилар – аёллар, болалар, кексалар ва имконияти чекланган шахслар учун мос бўлиши зарур.
Форум ва учрашувлар чоғида экологик ва энергия тежамкор ечимларни жорий этиш бўйича тавсиялар берилди. Ташриф якунида Жек Сим Ўзбекистоннинг бу соҳада барқарор ривожланишга эришиш имконияти катта эканини таъкидлади ҳамда ташкилотнинг қўшма лойиҳаларда узоқ муддатли ҳамкорликка тайёрлигини билдирди.
Шунингдек, у 2026-йилда Бутунжаҳон ҳожатхоналар ташкилоти саммитини Ўзбекистонда ўтказиш таклифи билан чиқди.
