Чирчиқ дарёсидан ноқонуний шағал олган мансабдор 6 йилга қамалди
У раҳбарлик қилган МЧЖ табиатга катта миқдорда зарар етказган.
Чирчиқ дарёсида ноқонуний қум-шағал қазиб олган мансабдор 6 йилга озодликдан маҳрум этилди. Бу ҳақида Экология вазирлиги хабар бермоқда.
Қайд этилишича, Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси, вилоят прокуратураси ва ҳуқуқни муҳофаза қилиш органлари ҳамкорлигида тунги рейд тадбири ўтказилган, унда Чирчиқ дарёси муҳофаза ҳудудидан қум-шағал аралашмаси ортиб берилаётганлиги аниқланган.
Ҳолатга аниқлик киритилганида қум-шағал аралашмаси Г.С. МЧЖ тегишли бўлган тош майдалаш цехига олиб бориб тўкилаётганлиги маълум бўлган. Ҳолат юзасидан давлат инспекторлари томонидан табиатга катта миқдорда зарар етказганлиги ҳисоб-китоб қилинган ва тўпланган ҳужжатлар ҳолатга ҳуқуқий баҳо бериш учун ҳуқуқни муҳофаза қилиш органларига юборилган.
Тошкент вилояти жиноят ишлари бўйича Оққўрғон туман суди томонидан Г.С МЧЖ раҳбари С.И. Жиноят кодексининг тегишли моддалари билан айбдор деб топилиб, узил-кесил ўташ учун 6 йил муддатга озодликдан маҳрум этилган. Жазони умумий тартибдаги колонияларда ўташ белгиланган. Шунингдек, ҳуқуқбузардан давлат фойдасига катта миқдорда зарар ва жарима ундирилиши белгиланган.
