Франция Фаластин давлатини расман тан олади
Макрон сентябрь ойида БМТ Бош Ассамблеясида Фаластинни тан олишини билдирган.
Франция Президенти Эммануэль Макрон мамлакати сентябрь ойида Бирлашган Миллатлар Ташкилоти Бош Ассамблеясида Фаластин давлатини расман тан олишини маълум қилди. Бу ҳақда у Фаластин Президенти Маҳмуд Аббосга юборган расмий мактубида баён қилган.
Макрон ижтимоий тармоқдаги саҳифасида шундай ёзди: “Яқин Шарқда адолатли ва барқарор тинчликка содиқ қолган ҳолда, Франция Фаластин давлатини тан олишга қарор қилди.”
Унинг баёнотида қайд этилишича, бу тан олиш расман сентябрь ойида бўлиб ўтадиган БМТ Бош Ассамблеяси йиғилишида эълон қилинади.
Макрон Ғаззаддаги урушни тўхтатиш, асирларни озод қилиш ва минтақада инсонпарварлик ёрдамини етказишни долзарб масала сифатида кўрсатди. Шунингдек, у Ҳамасни қуролсизлантириш ва Ғаззани хавфсиз ҳудудга айлантириш зарурлигини таъкидлади. “Фаластин давлати барпо этилиши ва унинг яшовчанлиги таъминланиши керак”, — деди у.
Франциянинг бу қарорига АҚШ расмийлари кескин норозилик билдирди. АҚШ Давлат котиби Марко Рубио Х (Twitter) орқали қилган баёнотида: “Америка Қўшма Штатлари Эммануэль Макроннинг Фаластинни тан олиш режасини қатъиян рад этади”, — деди.
