"Мен Таиланд ва Камбоджани яраштириш устида ишлаяпман" — Трамп
Таиланд ва Камбоджа ўртасидаги кескинлик ортидан АҚШ дипломатик воситачиликка тайёрлигини билдирди.
АҚШ Президенти Доналд Трамп Таиланд ва Камбоджа ўртасидаги зиддиятли вазиятни диққат билан кузатаётганини айтди ва икки давлатни яраштириш бўйича иш олиб бораётганини маълум қилди. Бу баёнот жанговар тўқнашувлар фонида янгради — чегарада ҳарбий ҳаракатлар ва дипломатик кескинликлар ортмоқда.
“Мен Таиланд ва Камбоджани яраштириш устида ишлаяпман”, — деди Трамп қисқа баёнотида.
23 июль куни Таиланд ҳукумати Камбоджа билан дипломатик муносабатларни пасайтириб, ўз элчисини чақириб олди ва Камбоджанинг Бангкокдаги элчисини чиқариб юборишини эълон қилди. Бунга сабаб — Таиланд ҳудудида юз берган мина портлаши натижасида ҳарбий хизматчининг оёғи узилгани бўлди. Таиланд ҳукумати бу минанинг яқинда ўрнатилганини даъво қилмоқда.
Шунингдек, барча чегара назорат пунктлари ёпилди ва туристик кириш қатъиян тақиқлаб қўйилди. Таиланд Ташқи ишлар вазирлиги расмий норозилик баёнотини Камбоджа томонига юборган.
Камбоджа Ташқи ишлар вазирлиги Таиланд айбловларини рад этиб, содир бўлган портлаш собиқ урушдан қолган миналар билан боғлиқ эканини билдирди. Расмий баёнотда айтилишича, Таиланд аскарлари келишилган патруль йўналишларидан четга чиққан ва хавфли ҳудудга кириб қолган.
Чегаранинг бир нечта нуқтасида артиллерия отишмалари қайд этилган. Ижтимоий тармоқларда Камбоджа армиясининг РМ-70 реактив артиллерия тизимларидан Таиланд тарафга қарата ўт очаётгани акс этган видеолар тарқалди. Бундай можаро туризм ва минтақавий хавфсизликка таҳдид солмоқда.
Вазият халқаро даражада хавотир уйғотмоқда. АҚШнинг воситачилик таклифи можаро авж олишининг олдини олишга қаратилган. Айни вақтда томонлар ўз позицияларида қатъий қолмоқда. BMT ва ASEAN аъзолари ҳам келгуси кунларда муносабат билдиришлари кутилмоқда.
