Навоийда ҳаво ифлосланиб кетганини жонли эфирда айтган журналистга босим бўлаётгани рад этилди
Навоий телеканалида жонли эфирларнинг вақтинча тўхтатилиши техник ишлар билан боғлиқ экани, Рухсора Бобоқуловага эса ҳеч қандай босим бўлмагани вилоят ҳокимлиги томонидан расмий равишда маълум қилинди.
Сўнгги кунларда ижтимоий тармоқларда журналист Рухсора Бобоқулова томонидан Навоийнинг экологик муаммолари ҳақида билдирган фикрларидан сўнг унга босим бўлаётгани, шунингдек, вилоят телеканалида жонли эфирлар тўхтатилгани ҳақидаги хабарлар тарқалди.
Мазкур ҳолатга аниқлик киритиш мақсадида Навоий вилояти ҳокимлиги Ахборот хизмати расмий баёнот билан чиқди.
Унга кўра, 2025 йил 23 июль куни вилоят телеканали студиясида техник жиҳозларни янгилаш ва LED экран ўрнатиш ишлари олиб борилган. Шу сабабли куннинг иккинчи ярмида жонли эфирлар вақтинча тўхтатилган.
Техник ишлар якунлангач, 24 июль куни соат 18:00 да очиқ мулоқот, 25 июль куни эса “Ассалом, янги кун!” тонгги дастури 08:00 дан 10:00 гача жонли эфирда узатилган.
Шунингдек, журналист Рухсора Бобоқуловага ҳеч қандай босим ёки тўсиқ қўйилмагани таъкидланмоқда. У ҳозирда ҳам ўз ижодий фаолиятини давом эттирмоқда. Расмий жадвалга кўра, у ҳафтанинг сешанба ва пайшанба кунлари жонли эфирларда бошловчилик қилади.
