Ўзбекистон Журналистлар уюшмаси Халқаро журналистлар уйига аъзо бўлди
Хитойда ўтказилган халқаро медиа-форумда дунёнинг 60 га яқин мамлакатидаги медиа вакиллари иштирок этди.
Хитойнинг Сзянси провинциясида “Матбуотнинг кучи: цивилизациялараро мулоқот ва глобал модернизацияга журналистларнинг таъсири” мавзусида халқаро медиа-форум бўлиб ўтди.
Форумда АҚШ, Германия, Франция, Хитой, Россия, Болгария, Беларус каби дунёнинг 60 га яқин мамлакатидаги 100 нафардан ортиқ оммавий ахборот воситалари вакиллари, медиа ташкилотлар раҳбарлари ва экспертлар иштирок этди.
Тадбир иштирокчилари ўзаро мулоқот, тажриба алмашиш, глобал журналистикадаги янги йўналишлар билан танишиш ва соҳадаги долзарб муаммоларга ечим излаш юзасидан фикр алмашди.
Форум доирасида Ўзбекистон Журналистлар уюшмаси Халқаро журналистлар уйига аъзо этиб қабул қилинди. Аъзолик дипломини тадбирда иштирок этган Уюшма раиси Холмурод Салимов тантанали тарзда қабул қилиб олди.
