“Украинадаги уруш 2034 йилгача чўзилиши мумкин”
Валерий Залужний уруш янги босқичга кирганини айтмоқда.
Украина Қуролли кучларининг собиқ бош қўмондони, айни дамда мамлакатнинг Буюк Британиядаги элчиси Валерий Залужний Украинадаги уруш 2034 йилгача чўзилиши мумкинлини айтди. У бу фикрни “Левый берег” нашрининг Youtube каналига берган интервюсида билдирди.
“Украина 2024 йилдан урушнинг янги босқичига кирди, бу Россия босқинининг бошидагидан сезиларли даражада фарқ қилади”, — деди собиқ қўмондон.
Залужнийнинг фикрича, Россия жанговар ҳаракатларни олиб боришга ёндашувни ўзгартирган ва энди олдинга силжишдан кўра кўпроқ Украина армиясини ҳамда тинч аҳолини ҳолдан тойдиришга қаратилган тактикани қўлламоқда.
“Агар биз келажак учун ўз мудофаамизни шакллантирмасдан фақат ўт очишни тўхтатишга ҳаракат қилсак, унда уруш яна давом этади. 2014 йилда бошланган уруш 2034 йилда якунланиши мумкин”, — деди у.
Залужнийнинг сўзларига кўра, 2022 йилда олдинда танклар, уларнинг ортида эса катта шахсий таркиб ҳаракатланган. Иккинчи жаҳон уруши намунасидаги бундай уруш 2023 йил декабр ойида тугаган ва энди танклар ва аскарлар ўрин алмашган.
“Уруш тугашини яқинлаштириш учун Украина мудофаа стратегияси ва ресурсларни сафарбар қилиш ёндашувларини қайта кўриб чиқиши керак”, — дея қўшимча қилди у.
