Хоразмда Уйғониш даври топилмалари аниқланди
Уларнинг айримлари IХ-ХI асрларга, бошқалари эса ХVIII-ХIХ асрларга тегишли.
Хоразм Маъмун академияси археологлари Уйғониш даври топилмаларини қўлга киритди. Бу ҳақида Ўзбекистон Республикаси Фанлар Академияси хабар бермоқда.
Айни пайтда Хоразм Маъмун академияси археологлари Баҳром Садуллаев раҳбарлигида Шовот туманида жойлашган Кат-қалъа ёдгорлигида археологик дала тадқиқот ишларини амалга оширмоқда.
Ушбу қадимий иншоот қолдиқларини очиш жараёнида юқори қатламларда 20 дан ортиқ чиқинди ўралар аниқланиб, улардан 3 таси IХ-ХI асрларга, қолганлари ХVIII-ХIХ асрларга тегишлидир. Шулардан IХ-ХI асрларга оид ўралар жуда кўплаб сирланган ва сирланмаган сопол буюмлардан иборат ноёб топилмалар коллекциясини тақдим этди.
Топилмалар орасида шиша буюмлар ва суякка туширилган нақш безаклари ҳам ҳунармандчиликнинг фақат кулолчилик тармоғи эмас балки бошқа турлари ҳам Хоразмда кенг ёйилганлигидан далолат беради. Шиша буюмларининг ясалиши, сопол идишларга ва суяк қолдиқларига берилган безаклар, уларнинг ишланиш услуби ўрта асрларда Хоразм воҳасида фаёлият юритган уста ҳунармандларнинг юксак даражадаги малака соҳиби бўлганликларидан далолат беради.
