Самарқандда машҳур “қўзиқорин уй”ни бузиш бошланди

Самарқанд шаҳрининг «Конигил» маҳалласида жойлашган ва “қўзиқорин уй” номи билан машҳур бўлган 12 қаватли ноқонуний бино бузиб ташланмоқда. Қурилиш ва уй-жой коммунал хўжалиги вазирлигининг маълумотига кўра, мазкур бино ҳеч қандай лойиҳа ҳужжатлари, архитектура рухсатномаси ва қурилишга рухсат берувчи ҳужжатларсиз қурилган.

 

Фуқаро F.Xalilov томонидан қурилган меҳмонхона шаклидаги бино дастлаб 9 қават сифатида режалаштирилган бўлсада, кейинчалик 3 та қўшимча «чодир»симон қават қўшилиб, баландлиги 35 метрдан ошган. Бино қурилиши давомида бир неча бор тўхтатиш бўйича кўрсатмалар берилган бўлсада, ишлар ўзбошимчалик билан давом эттирилган. Бундан ташқари, биринчи қаватда рухсатсиз фаолият юритган кафе ҳам аниқланган.

 

2022 йилнинг 6 июль куни Тойлоқ туманлараро фуқаролик ишлари бўйича суд F.Xalilovga бинони ўз ҳисобидан бузиш ҳақида қарор чиқарган. "Ўзоғирсаноатлойиҳа" институти ҳамда ҳудудий инспекция хулосасига кўра, бино сейсмик хавфсизлик талабларига жавоб бермаган, конструкцияларда эса дарз кетган жойлар мавжудлиги аниқланган.

 

Вазирлик томонидан маълум қилинишича, бино қурилиши давомида на муҳандислик-геология текширувлари, на лойиҳа-смета ҳужжатлари тўлиқ ишлаб чиқилган. Лойиҳа ҳужжатлари охиригача тасдиқланмаган бўлишига қарамай, “Триумф Проект” хусусий экспертизаси томонидан асоссиз ижобий хулоса берилган. Ҳозирда Республика комиссияси хулосаси асосида бузиш ишлари бошланган.