ДХХ учта ҳудудда солиқ, МИБ, қурилиш ва ҳокимлик ходимларини қўлга олди

Давлат хавфсизлик хизмати (ДХХ) томонидан Наман­ган, Тошкент ва Қашқадарё вилоятларида ўтказилган тезкор тадбирлар давомида бир нечта коррупция ҳолатлари аниқланиб, мансабдор шахслар жиноят устида қўлга олинди. Бу ҳақда Zamon.uz га ДХХ хабар берди.

 

Наман­ган вилоятида Қурилиш ва уй-жой коммунал хўжалиги назорати инспекциясининг бош мутахассиси 2024 йил январь ойида 8 йилга озодликдан маҳрум этилган маҳкумнинг ишини қайта кўриб чиқиб, енгилроқ жазо тайинлаш учун суд тизимидаги танишлари орқали 30 минг АҚШ доллари талаб қилган. ДХХ ва Ижро ҳужжатларини таъминлаш департаменти ходимлари ҳамкорлигида ўтказилган тадбирда у 10 минг долларни олаётганида ушланди. Қайд этилишича, ушбу шахс илгари ҳам фирибгарлик билан боғлиқ жиноятлар учун бир неча бор судланган.

 

Яна Наман­ган вилоятида мол-мулкларни баҳолаш билан шуғулланувчи МЧЖ раҳбари 783 миллион сўмлик солиқ қарздорлигини 141 миллион сўмгача камайтириб бериш эвазига 4400 АҚШ доллари олган ва айни вақтда қўлга олинган. Шунингдек, ушбу порага алоқадор бўлган вилоят солиқ бошқармасининг шўба бошлиғи ҳам 4400 долларни олаётганда ушланган.

 

Тошкент шаҳрида, Миробод туман ҳокимлигига қарашли Ижтимоий мослаштириш маркази раҳбари фуқаролиги бўлмаган шахсга паспорт расмийлаштириб бериш ва доимий рўйхатга қўйиш эвазига 1200 доллар пора олаётганида ДХХ томонидан қўлга олинган.

 

Қашқадарё вилоятида эса Мажбурий ижро бюроси Қарши шаҳар бўлими давлат ижрочиси 70 миллион сўмлик қарзни ундирмаслик учун, қарздорнинг автотранспортига қўйилган тақиқни олиб ташлаш эвазига 1000 АҚШ доллари талаб қилган. Пул маблағи Қарши туманидаги фермер хўжалиги раҳбари орқали берилаётганида ушланган.

 

Ҳозирда барча гумонланувчиларга нисбатан жиноят ишлари қўзғатилган бўлиб, тергов ҳаракатлари олиб борилмоқда. Давлат органлари коррупцияга қарши курашни қатъий давом эттиришини маълум қилган – айнан коррупция ислоҳотларнинг асосий тўсиғи сифатида баҳоланмоқда.