Йил бошидан буён Ўзбекистонга импорт қилинган автомобилларнинг ярмидан кўпини электромобиллар ташкил этади
Хитой асосий етказиб берувчи бўлиб, импорт ҳажмининг 87 фоизи айнан ушбу давлат ҳиссасига тўғри келади.
Давлат статистика қўмитаси маълумотларига кўра, 2025-йилнинг январ–июн ойларида Ўзбекистонга умумий қиймати 422,1 миллион АҚШ долларига тенг бўлган 24 367 дона енгил автомобил импорт қилинган. Улардан 14 356 таси, яъни 59 фоиздан ортиғи электромобилларни ташкил этади.
Импорт автомобилларнинг асосий қисми Хитойдан етказиб берилган бўлиб, жами импортнинг 87 фоизидан кўпроғи ушбу давлат ҳиссасига тўғри келади. Хусусан, олти ой ичида Хитойдан 21 399 дона автомобиль олиб кирилган.
Бундан ташқари, Жанубий Кореядан 2 032 та, Ҳиндистондан 168 та, Япония ва АҚШдан 145 тадан автомобиль импорт қилинган. Қолган транспорт воситалари бошқа хорижий давлатлардан етказиб берилган.
