Ўзбекистонда Сув кодекси қабул қилинди

30 июль куни қабул қилинган Ўзбекистон Республикасининг “Сув кодекси тўғрисида”ги Қонун (ЎРҚ–1076-сон) билан мамлакатда сув ресурсларини бошқариш ва ундан фойдаланишга оид асосий ҳуқуқий ҳужжат – Сув кодекси тасдиқланди.

 

Янги Кодекс сув ресурслари, сув хўжалиги объектлари ва сув фонди ерларидан оқилона фойдаланиш, уларни муҳофаза қилиш соҳасидаги муносабатларни ҳуқуқий жиҳатдан тартибга солишга хизмат қилади.

 

Сув кодексида қуйидаги асосий қоидалар белгиланган:

 

Сув – умумхалқ бойлигидир ва ундан оқилона фойдаланиш давлат ҳимоясида бўлади;

 

Сувдан фойдаланиш икки шаклга – умумий ва махсус фойдаланишга бўлинади;

 

Сув объектлари тоифаларига Ўзбекистон ҳудудидаги ер усти ва ер ости сув манбалари, шунингдек, мамлакатдан ўтувчи трансчегаравий сув объектлари киради;

 

Сув объектлари якка тартибда ёки бошқа фойдаланувчилар билан биргаликда фойдаланилиши мумкин.

 

 

Кодексда, шунингдек, сув ресурсларини бошқариш соҳасида қарорлар қабул қилишда ҳамкорликни кучайтириш мақсадида республика, ҳавза ва зарур ҳолларда ҳудудий даражадаги Сув кенгашлари ташкил этилиши белгиланган. Бундан ташқари, Вазирлар Маҳкамаси ҳузурида Республика Сув кенгаши ташкил этилади.

 

Мазкур Қонун расмий эълон қилинган кундан бошлаб 3 ойдан кейин кучга киради.