Талабалар сохта ҳужжатлар билан ўқишга қабул қилиняптими?
Муҳокамаларга сабаб бўлган ҳолатга вазирлик изоҳ берди.
Сўнгги кунларда ижтимоий тармоқларда айрим талабаларнинг сохта ҳужжатлар асосида олий таълим ташкилотларига қабул қилингани ҳақидаги хабарлар муҳокамаларга сабаб бўлди. Бунга Олий таълим, фан ва инновациялар вазирлиги расмий муносабат билдирди.
Таъкидланишича, HEMIS тизими орқали ҳар бир талабанинг қабул қилиниши, ўқиётган йўналиши ва курси аниқ қайд этилади. Хориждан ўқишини кўчиришда эса фақат расмий ҳужжатлар асосида, ўқув режалари солиштирилиб, ректор буйруғи билан қабул амалга оширилади. Бу жараён электрон тизимда тўлиқ ва шаффоф юритилади, асоссиз маълумотлар киритилмайди.
“Олий таълим, фан ва инновациялар вазирлиги мазкур масала юзасидан текширув олиб бормоқда. Агар қонунбузарлик ҳолатлари аниқланса, белгиланган тартибда ҳуқуқий баҳо берилиб, жамоатчиликка расмий ахборот тақдим этилади”, дейилади хабарда.
