Камчаткадаги ўзбекистонликлар огоҳлантирилди
Бир кечада ҳудудда 200 дан ортиқ ерости силкинишлари юз берди.
Россиянинг Камчатка яримороли қирғоқларида 6,3 магнитудали зилзила қайд этилди. Бу ҳақида маҳаллий нашрлар ёзмоқда.
Қайд этилишича, зилзила эпицентри Петропавловск-Камчатскийдан 178 км шарқда жойлашган, эпицентр 39,4 км чуқурликда жойлашган.
Шунингдек, 30 июлдан 31 июлга ўтар кечаси сейсмологлар 200 дан ортиқ ерости силкинишларини қайд этишган.
Камчатка Соғлиқни сақлаш бошқармаси берган маълумотга кўра, зилзила вақтида жабрланган фуқаролар шифокорлар назоратида, барча беморларга зарур ёрдам кўрсатилмоқда, жиддий жароҳатланганлар қайд этилмаган. Жабрланганлар орасида Ўзбекистон фуқаролари йўқ.
Россия Фавқулодда вазиятлар вазирлиги цунами хавфи сабаб Камчатка ўлкаси ва Сахалин вилояти қирғоқларидаги аҳолига юқорироқ ҳудудларга чиқишни ва сувга яқинлашмасликни тавсия қилди.
Зарурат туғилса, фуқаролар Ўзбекистоннинг Владивостокдаги Бош консулхонасига қуйидаги мурожаат қилишлари эслатиб ўтилган.
