Навоийда ҳаво ифлосланишига сабабчи 3 корхона фаолияти вақтинча тўхтатилди

Атроф-муҳитни муҳофаза қилиш борасидаги чора-тадбирлар доирасида Экология, атроф-муҳитни муҳофаза қилиш ва иқлим ўзгариши вазирлиги томонидан Навоий шаҳрида фаолият юритаётган бир нечта саноат субъектларининг фаолияти вақтинча тўхтатилди.

 

Хусусан, 19-июль куни шаҳарнинг турли ҳудудларида ҳавонинг кескин ифлосланиши ва оқ тутун кўриниши бўйича жамоатчиликдан тушган мурожаатлар асосида ўтказилган текширув натижасида қуйидаги ҳолатлар аниқланди:

 

“Зарафшон Индастриал Технологи” МЧЖ – корхона томонидан атроф-муҳитга чиқарилаётган зарарли моддаларнинг миқдори экологик экспертиза хулосасида белгиланган меъёрдан бир неча баробар юқори бўлгани маълум бўлди. Жумладан, водород сульфид – 25 баробар, азот оксиди – 12 баробар, аммиак – 7 баробар, олтингугурт диоксиди – 2,6 баробарддан ортиқ ифлослантирувчи модда аниқланган.

 

“Согда Кимё Заводи” МЧЖ – тегишли давлат экологик экспертизасидан ўтмасдан ишлаб чиқариш фаолиятини олиб борган. Бундан ташқари, чиқиндиларни тартибсиз сақлаш, очиқ ҳовузларда зарарли моддаларни йиғиш, кислотали сувларни очиқ майдонларга ташлаш ҳолатлари аниқланган. Корхонага атроф-муҳитга етказилган зарар эвазига 7 миллиард 382 миллион сўм миқдорида тўлов белгиланди.

 

“Ферросплав” МЧЖ – ҳам экологик экспертизадан ўтмасдан фаолият юритиб келган. Атмосферага зарарли моддалар чиқарилгани ва саноат чиқиндилари тартибсиз тўплангани аниқланган.

 

Экологик қонунчилик талаблари бузилгани сабабли ушбу учта корхона фаолияти 10 кунга тўхтатилди. Агар бу муддат ичида камчиликлар бартараф этилмаса ва фаолият экологик меъёрларга мослаштирилмаса, судга мурожаат қилиниб, корхоналарнинг фаолиятини тўлиқ тўхтатиш чоралари кўрилади.