Энди ўқитувчи ва ўқувчиларга ҳам санаторийларга йўлланма берилади

2025 йил 29 июл куни Вазирлар Маҳкамасининг қарори билан “Мактабгача ва мактаб таълими вазирлиги тизимидаги дам олиш масканларига дам олувчиларни қабул қилиш тартиби тўғрисида”ги Низом тасдиқланди.

 

Ҳужжатга кўра, Мактабгача ва мактаб таълими вазирлиги тизимида фаолият юритаётган илғор педагог кадрлар ҳамда 7–14 ёшдаги иқтидорли ўқувчиларнинг вазирликка қарашли дам олиш масканларига юборилиши тартиби белгиланди.

 

Дам олиш муддати педагог кадрлар учун сентябрь-май ойларида, иқтидорли ўқувчилар учун эса июн-август ойларида 12 кун этиб белгиланади. Йўлланмалар саралаш мезонлари асосида тақдим этилиб, юқори кўрсаткичларга эга бўлган номзодларга бепул асосда берилади.

 

Илғор педагоглар қаторига халқаро ва республика олимпиада ғолибларини тайёрлаган ўқитувчилар, халқаро сертификатларга эга хорижий тил ва STEAM фанлари мутахассислари, танлов ва мусобақалар совриндорлари, олий малакадаги бошланғич синф ҳамда мактабгача таълим педагоглари киритилади.

 

Иқтидорли ўқувчилар эса халқаро ва республика даражасидаги олимпиада, мусобақа ва танловларда юқори натижаларга эришганликлари асосида танлаб олинади.

 

Дам олиш жараёнида ўқувчилар учун соғломлаштириш, спорт, маънавий-маърифий, илмий-тадқиқот йўналишларида ҳамда туризм, техника, санъат ва китобхонлик соҳаларида қобилиятни ривожлантиришга қаратилган турли тадбирлар ташкил этилади.