Тошкентда ЙПХ ходимини ҳақоратлаган ҳайдовчи қамалди
У пойтахт кўчаларида юқори тезликда ҳаракатланиб, инспекторнинг талабига бўйсунмаган.
Ижтимоий тармоқларда шаҳар бўйлаб соатига 200 км дан ортиқ тезликда ҳаракатланаётган Zeekr 007 русумли автомашина ҳайдовчиси инспекторнинг талабига биноан тўхтамай, уни ҳақорат қилгани акс этган видео тарқалди.
Тошкент шаҳар Ички ишлар бош бошқармаси томонидан воқеа ҳолатлари ўрганилиб, ҳуқуқбузарнинг шахси аниқланди. Маълум бўлишича, ҳайдовчи бир вақтнинг ўзида бир нечта йўл ҳаракати қоидаларини бузган.
Ички ишлар бўлимида 19 ёшли ҳайдовчи йигит ўз айбига иқрор бўлиб, инспектор тўхтатишни талаб қилганида, тезлик юқори бўлгани сабаб тўхтаб қололмаганини айтди. Унинг машинада бўлган дўсти бўлаётган воқеаларни нафақат видеога, балки ижтимоий тармоқларга ҳам жойлаштирган.
Ҳайдовчига нисбатан Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (ички ишлар органлари ходимининг қонуний талабларини бажармаслик) билан маъмурий иш қўзғатилди. Суд уни айбдор деб топиб, 5 суткага маъмурий қамоққа олиш бўйича қарор чиқарди.
