Сенат вояга етмаганларга нисбатан жиноий жавобгарликни юмшатувчи қонунни маъқуллади
Энди 18 ёшга тўлгунга қадар содир этган енгил жинояти учун жазони ўтаган шахс судланган ҳисобланмайди.
Сўнгги йилларда мамлакатимизда вояга етмаганларнинг ҳуқуқ ва эркинликларини таъминлаш, уларни ижтимоий ҳаётга қайта мослаштиришга доир ислоҳотлар босқичма-босқич амалга оширилмоқда.
Олий Мажлис Сенатининг 9-яппи мажлисида сенаторлар томонидан “Вояга етмаганларга нисбатан жиноий жавобгарлик янада либераллаштирилиши муносабати билан Ўзбекистон Республикасининг Жиноят кодексига ўзгартиш ва қўшимчалар киритиш тўғрисида”ги қонун кўриб чиқилиб, маъқулланди.
Статистикага кўра, 2023 йилда 1911 нафар, 2024 йилда эса 2214 нафар вояга етмаган жиноят содир этгани учун жавобгарликка тортилган. Жиноятларнинг катта қисми — ижтимоий хавфи унча катта бўлмаган ва ўртача оғирликдаги жиноятлардан иборат.
Қонун билан:
18 ёшга тўлгунча содир этган, ўта оғир бўлмаган жинояти учун жазони ўтаган шахс судланган ҳисобланмайди;
Озодликни чеклаш ва қамоқ жазосининг энг кам муддати 6 ойдан 1 ойгача қисқартирилади.
Мазкур қонун 2022–2026 йилларда Янги Ўзбекистонни ривожлантириш стратегияси доирасида, “Халқ учун ғамхўрлик ва сифатли таълим йили” давлат дастурида белгиланган вазифаларни амалга оширишга хизмат қилади.
Сенаторларнинг фикрича, қонун вояга етмаганларга нисбатан жиноий жавобгарликни инсонпарварлик мезонлари асосида енгиллаштириб, уларнинг жамиятга мослашувига кўмаклашади.
