Тошкент вилоятида янги халқаро аэропорт қурилади
Президент транспорт инфратузилмасини модернизация қилиш бўйича йирик лойиҳалар билан танишди.
Иқтисодий ўсиш ва урбанизация фонида транспорт инфратузилмасига бўлган талаб сезиларли даражада ортаяпти. Хусусан, 2030 йилга келиб пойтахт аэропорти йўловчилар оқими йилига 15 миллион нафарга етиши прогноз қилинмоқда. Бироқ амалдаги аэропорт бу ҳажмни қамраб олиш имкониятига эга эмас. Бундан ташқари, шаҳарнинг марказий қисмида жойлашганлиги сабабли уни кенгайтириш ҳам имконисиз.
Шу муносабат билан Тошкент вилоятида янги халқаро аэропорт барпо этиш ташаббуси илгари сурилмоқда. Айни пайтда лойиҳа бўйича хусусий шериклик асосида хорижий инвесторларнинг таклифлари ўрганилмоқда.
Шунингдек, автомобил йўлларини ривожлантириш бўйича ҳам салмоқли ишлар амалга оширилмоқда. Мавжуд магистралларга муқобил равишда янги йўлларни қуриш бўйича лойиҳалар ишлаб чиқилмоқда. Бу борада хорижий инвесторлар иштирокида Тошкент—Самарқанд йўналишида тез ҳаракатланувчи автомобил йўли қурилиши лойиҳасига қизиқиш билдирилган.
Учрашув давомида инвесторлар билан олиб борилган музокаралар натижалари, таклиф этилаётган шартлар ва лойиҳаларнинг ҳуқуқий асослари юзасидан ҳам маълумотлар тақдим этилди.
Давлат раҳбари мазкур стратегик инфратузилма лойиҳаларини пухта ишлаб чиқиш, уларни халқаро стандартларга мос ҳолда амалга ошириш ва тез орада амалий босқичга ўтказиш зарурлигини таъкидлади.
