“Ўзбекистон фуқаролари Россия томонида жанг қиляпти”
Зеленский урушдаги ёлланма аскар сифатида иштирок этаётган Ўзбекистон, Тожикистон, Хитой, Покистон ҳамда Африка давлати фуқаролари ҳақида гапирди.
Украина президенти Владимир Зеленский бир гуруҳ Марказий Осиё давлати фуқаролари, жумладан, ўзбекистонликлар Россия томонидан урушда ёлланма аскар сифатида иштирок этаётганини айтди. Бу ҳақида у ўзининг Телеграмдаги расмий каналида маълум қилди.
Куни кеча Владимир Зеленский Харков вилоятига — айни пайтда Украина ва Россия Федерацияси қўшинлари ўртасидаги фронт чизиғи жойлашган Вовчанск ҳудудига ташриф буюрди. Ҳарбийлар билан суҳбатда Владимир Зеленский ёлланма аскарлари Россия томонида жанг қилаётган давлатларни санаб ўтган. Хусусан, Украина президенти ўзбеклар, тожиклар, хитойликлар, покистонликлар ҳамда Африка давлатларидан келган ёлланма аскарларни номини тилга олган.
“Дронлар билан таъминлаш ва уларни қўллаш, рекрутинг ва бригадаларни тўғридан тўғри молиялаштириш масалаларини алоҳида кўтардик. Бу йўналишдаги жангчилар Хитой, Тожикистон, Ўзбекистон, Покистон ва Африка мамлакатларидан келган ёлланма аскарларнинг урушдаги иштирокини қайд этмоқда. Муносабат билдирамиз”, деган Зеленский.
Ҳарбийлар олдидаги нутқи якунида Зеленский юзага келган ҳолатлар туфайли тегишли муносабат билдирилишини айтган. Украина раҳбари қандай муносабат билдирганига ҳозирча аниқлик киритмади.
Маълумот учун, Россия 2025 йилда армия билан шартнома тузган камида 902 нафар Ўзбекистон фуқаросини урушга ёллаган.
