Тошкентда болалар учун расмлар кўрик-танлови бўлиб ўтди
Унда республикадан 30 352 нафар тарбияланувчилар ўзларининг ижодий ишлари билан иштирок этди.
Кеча, 5 август куни Тошкент шаҳридаги “Ботаника боғи”да республика миқёсида “Табиат болалар нигоҳида” номли расмлар кўрик-танлови бўлиб ўтди.
Унда Экология ва атроф-муҳитни муҳофаза қилиш, иқлим ўзгариши вазирлиги билан ҳамкорликда мактабгача таълим ташкилотлари тарбияланувчилари ўртасида табиат ва атроф-муҳитни асраб-авайлашга бағишланган “табиат болалар нигоҳида” расмлар танлови саралаш босқичлари ўтказилди.
Танловнинг мактабгача таълим ташкилоти босқичида 30 352 нафар тарбияланувчилар ўзларининг ижодий ишлари билан иштирок этишди. Улардан 18 057 нафар ўғил болалар, 12 295 нафар қиз болаларни ташкил этади.
Танловда мактабгача таълим ташкилотлари ходимлари ҳамда боғча болалари иштирок этишди. Иқтидорли болаларни бир жойга жамлаган мазкур танловда турли вилоятлардан иштирокчилар ташриф буюрган. Танлов иштирокчилари 6-8 ёшни ташкил этади. Тадбирда ёшларни қўллаб-қувватлаш мақсадида уларнинг ота-оналари ҳам ташриф буюрган.
Ўғил болалар ўртасида биринчи ўрин Андижон вилояти Пахтаобод туманидаги 7-ДМТТ тарбияланувчиси Абдурахмонов Мустафо Шокиржон ўғлига насиб қилди.
Қиз болалар ўртасида биринчиликни Қорақалпоғистон Республикаси Нукус шаҳридаги 35-ДМТТ тарбияланувчиси Сапарбаева Айсанем Батирбаевна эгаллади.
