Самарқандда ўқитувчилар мажбурий меҳнатга жалб қилинди
Ҳозирда ушбу ҳолат расмийлар томонидан назоратга олинган.
Ижтимоий тармоқларда Самарқанд шаҳридаги 32-умумтаълим мактаби ўқитувчилари спорт залида таъмирлаш ишлари амалга ошираётгани айтилган хабар тарқалди. Ҳолатга вилоят мактабгача ва мактаб таълими бошқармаси расмий муносабат билдирди.
Ўрганиш натижаларига кўра, расмлардаги ҳолат Самарқанд шаҳридаги 32-умумтаълим мактаби эмас, шаҳардаги 24-умумтаълим мактабига тегишли эканлиги аниқланган.
“Самарқанд вилояти Мактабгача ва мактаб таълими бошқармаси мажбурий меҳнатга жалб этиш билан боғлиқ ҳар қандай ҳолатларни қоралайди. Ушбу ҳолат бошқарма томонидан тўлиқ назоратга олинди. Ҳолат тегишли тартибда ўрганилиб, қўшимча маълумот берилади”, дейилади хабарда.
Эслатиб ўтамиз, аввалроқ Андижон вилоятининг Марҳамат туманидаги мактабда ҳам ўқитувчилар таъмирлаш ишларига жалб қилингани учун директор ишдан олиниб, унга нисбатан маъмурий жарима тайинланганди.
