1 ноябрдан ишсизлик нафақаси бўйича янги тартиб жорий этилади
Янги тартибга кўра, ишсизлик нафақаси 3 ой давомида ўртача иш ҳақининг 75–50 фоизи миқдорида тўланади.
2025 йил 1 ноябрдан бошлаб ишсизлик нафақаси тўлаш тартибида янги қоидалар жорий этилади. Президентнинг “Меҳнат муносабатлари ва касбга тайёрлаш тизимини такомиллаштириш ҳамда иш берувчиларни рағбатлантиришга оид қўшимча чора-тадбирлар тўғрисида”ги фармонига мувофиқ, нафақа эндиликда фақат меҳнат шартномаси бекор қилинган фуқароларга берилади.
Янги тартибга кўра:
Ариза берувчи сўнгги 5 йил ичида камида 18 ой ишлаган бўлиши керак;
Ишдан бўшаганидан кейин 6 ой ичида мурожаат қилган тақдирда нафақа тайинланади;
Нафақа муддати — 3 ой;
1-ойда — ўртача иш ҳақининг 75 фоизи (лекин энг кам иш ҳақининг 3 бараваридан ошмаган миқдорда);
2- ва 3-ойларда — ўртача иш ҳақининг 50 фоизи (лекин энг кам иш ҳақининг 3 бараваридан ошмаган миқдорда).
Такроран нафақа олиш учун охирги тўлов муддати тугаганидан сўнг қўшимча камида 12 ой иш стажи талаб этилади.
