Ўзбекистонда илк бор уникал юрак жарроҳлиги амалга оширилди
6 ёшли беморда уч табақали клапан олиб ташланиб, унинг ўрнига юрак ўнг бўлмачаси қулоқчасидан янги клапан ўрнатилди.
Тошкент давлат тиббиёт университети болалар кўп тармоқли клиникасида Ўзбекистонда илк бор мураккаб юрак клапани операцияси муваффақиятли бажарилди.
Амалиёт 6 ёшли беморда ўтказилиб, уч табақали клапандаги жиддий шикаст туфайли у бутунлай олиб ташланди. Жаррохлар беморнинг ўз юраги ўнг бўлмачаси қулоқчасидан янги клапан шакллантириб, уни ўрнатди. Мазкур усул одатда фақат юқори технологияга эга ривожланган тиббиёт марказларида қўлланади.
Операцияни болалар кардиожарроҳи Бобур Тўраев амалга оширди. У ёш бўлишига қарамай, мингдан зиёд болаларда муваффақиятли юрак операцияларини ўтказган. 2018–2019 йилларда “Эл-юрт умиди” жамғармаси стипендияси асосида Буюк Британиянинг University College London университетида таҳсил олган ва дунёнинг 10 дан ортиқ илғор клиникаларида тажриба орттирган.
Жорий йилнинг дастлабки саккиз ойида Тошкент давлат тиббиёт университети болалар клиникасида бўлим мудири Н. Ибрагимов раҳбарлигида 500 га яқин юрак операцияси бажарилган бўлиб, уларнинг катта қисмда Б. Тўраевнинг ҳам бевосита иштироки бор.
