Ўзбекистонда барча мактаб ва боғчаларда мажбурий меҳнат устидан “рейд”лар бошланди
Ижтимоий тармоқларда тарқалган видеолардан сўнг, вазирлик мажбурий меҳнат ҳолатлари бўйича назорат тадбирлари ўтказилишини эълон қилди.
Аввалроқ Zamon.uz Самарқанд шаҳридаги 1- ва 24-мактабларда ўқитувчилар мажбурий равишда таъмирлаш ишларига жалб қилингани, бунда иштирок этмаган педагоглар эса ишдан бўшатилгани ҳақида видеолавҳа эълон қилганди.
Шунингдек, Андижон вилоятининг Марҳамат туманида меҳнат таътилидаги ўқитувчиларни мактабнинг таъмирлаш ишларига жалб қилган директор ҳам ишдан олинганди.
Юқоридаги воқеалар фонида Мактабгача ва мактаб таълими вазирлиги тизимдаги таълим муассасаларида мажбурий меҳнат устидан назорат тадбирлари ўтказилишини маълум қилди.
Қайд этилишича, жорий йилнинг 15 август кунидан бошлаб Мактабгача ва мактаб таълими вазирлиги ҳамда Камбағалликни қисқартириш ва бандлик вазирлиги ҳамкорлигида вазирлик тизимидаги мактаб ва мактабгача таълим муассасаларида мажбурий меҳнатга қарши кураш бўйича назорат тадбирлари олиб борилади.
Бунда педагогларни мажбурий меҳнатга жалб этиш ҳолатлари ўрганилиб, аниқланган қонун бузилиш ҳолатлари бўйича иш берувчи ҳамда мансабдор шахсларга нисбатан тегишли жавобгарлик чоралари қўлланилади.
Таъкидланишича, “Педагогнинг мақоми тўғрисида”ги Қонунига мувофиқ, педагогларни касбий фаолияти билан боғлиқ бўлмаган ишларга жалб қилиш тақиқланади. Шунингдек, қонунчилик талабларига биноан ўқитувчиларни мажбурий меҳнатга жалб этганлик учун маъмурий ва жиноий жавобгарликкача бўлган жазо турлари белгиланган.
