“Зеленский хоҳласа, урушни дарҳол тугатиши мумкин” — Трамп

АҚШ президенти Доналд Трамп Украина президенти Владимир Зеленский истаса, Россия билан урушни “дарҳол тугатиши мумкинлигини” айтди. У, шунингдек, Қримни қайтариб бўлмаслигини ва Украинанинг НАТОга аъзо бўлиши “имконсиз”лигини таъкидлади.

 

Трамп бу фикрларни якшанба куни ижтимоий тармоқлардаги постларида ёзди:

 

“Обамадан 12 йил олдин бирорта ўқ отмасдан бериб юборилган Қримни қайтариб бўлмайди! Украина НАТОга кира олмайди. Баъзи нарсалар ҳеч қачон ўзгармайди!!!”

 

Душанба куни Вашингтонда Зеленский ва Трамп учрашади. Аввал икки томонлама учрашув, кейинроқ эса Европа раҳбарлари иштирокидаги кенгайтирилган музокаралар бўлиши кутилмоқда.

 

Германия канцлери Фридрих Мерс, Франция президенти Эммануэль Макрон, Британия бош вазири Кейр Стармер ҳамда Европа Комиссияси раҳбари Урсула фон дер Ляйен Зеленскийни қўллаб-қувватлаш учун Вашингтонга ташриф буюради. Улар Украинанинг хавфсизлиги учун АҚШни ҳам жалб этувчи кафолатлар муҳокамасини кучайтиришни режалаштирмоқда.

 

Трамп эса яқинда Аляскада Россия президенти Владимир Путин билан учрашиб, урушни тўхтатиш бўйича музокараларни муҳокама қилган эди. Reuters манбаларига кўра, таклифлардан бири — Россия кичик ҳудудлардан воз кечиши эвазига, Украина шарқдаги баъзи ҳудудларни бериб юбориши ва фронтни музлатиб қўйиш. Зеленский бу таклифни рад этган.

 

Европа етакчилари биргаликдаги баёнотида Украина чегараларини ўзгартиришга йўл қўйилмаслигини ва “хавфсизликни кафолатлаш учун қўшинлар жойлаштиришга тайёр” эканини маълум қилди.

 

Трампнинг яқинлари эса НАТОга аъзолик ўрнига АҚШдан “НАТОнинг 5-моддасига ўхшаш мудофаа кафолатлари” таклиф қилинаётганини айтмоқда.

 

Уруш 2022-йилдан бери давом этиб, 1 миллиондан ортиқ одам ҳалок бўлган ёки яраланган.