Андижонда аёл эркакнинг шахсий суратларини тарқатиш билан қўрқитиб, 300 доллар талаб қилди
Собиқ танишидан шантаж йўли билан пул талаб қилган 34 ёшли аёл жиноят устидан қўлга олинди.
Андижон вилоятида шахсий ҳаёт дахлсизлигига оид товламачилик ҳолати аниқланиб, жиноятга алоқадор шахс қўлга олинди. Бу ҳақда Андижон вилояти ИИБ хабар берди.
Ҳуқуқни муҳофаза қилувчи органларга мурожаат қилган фуқаро эски таниши унга шахсий суратларини тарқатиш билан таҳдид қилиб, пул талаб қилганини маълум қилган.
Ўтказилган тезкор тадбирлар давомида Шаҳрихон туманида яшовчи 34 ёшли аёл собиқ танишидан 300 АҚШ доллари талаб қилгани ва ушбу маблағни олаётган вақтида жиноят устидан қўлга олингани аниқланди.
Мазкур ҳолат юзасидан Ўзбекистон Республикаси Жиноят кодексининг 165-моддаси (“Товламачилик”) бўйича жиноят иши қўзғатилган.
Ҳозирда тергов ҳаракатлари олиб борилмоқда. Амалдаги қонунчиликка мувофиқ, бундай қилмиш учун уч йилдан беш йилгача озодликни чеклаш ёки озодликдан маҳрум қилиш жазоси назарда тутилган.
