Иордания Подшоҳи Самарқанднинг тарихий обидалари билан танишди
Пайғамбаримиз Муҳаммад алайҳиссаломнинг қизи Фотима ва куёви Али ибн Абу Толибнинг авлодлари ҳисобланган Ҳошимийлар сулоласи вакили бўлган Иордания Подшоҳи Қусам ибн Аббос хотирасига ҳурмат бажо келтирди.
Иордания Подшоҳи Абдулла II ибн ал-Ҳусайн Ўзбекистон Президенти Шавкат Мирзиёев ҳамроҳлигида қадимий Самарқанд шаҳрининг улуғвор тарихий ва маданий обидаларини кўздан кечирди.
Давлат раҳбарлари энг аввало Шоҳи Зинда мажмуасини зиёрат қилдилар. Бу ерда Пайғамбаримиз Муҳаммад (с.а.в.) саҳобаларидан Қусам ибн Аббос ва бошқа машҳур арбобларнинг мақбаралари жойлашган бўлиб, мажмуа асрлар давомида меъморчилик ва наққошлик санъати тараққиётини ўзида мужассам этади. Шоҳи Зинда 2001 йилда ЮНЕСКОнинг Бутунжаҳон мероси рўйхатига киритилган.
Ҳошимийлар сулоласининг вакили, Подшо Абдулла II Қусам ибн Аббос хотирасига ҳурмат бажо келтирди. Қуръон тиловати ва дуо ўқилди.
Ташриф доирасида Иордания делегацияси Амир Темур мақбарасини ҳам зиёрат қилди. Меҳмонларга Соҳибқироннинг давлат қурилиши, ҳарбий маҳорати, дипломатик фаолияти ва ўз даврининг энг қудратли давлатини барпо этгани ҳақида батафсил маълумот берилди.
Давлат раҳбарлари кейинчалик Регистон мажмуасига ҳам ташриф буюрдилар. Мирзо Улуғбек, Шердор ва Тиллакори мадрасаларидан иборат бу ёдгорликлар асрлар давомида илм-фан маркази бўлиб хизмат қилган. Мажмуа ўзининг мукаммал меъморий уйғунлиги билан Самарқанднинг рамзига айланган.
Меҳмонларга ушбу обидалар тарихий яратилиш жараёни, безак санъати хусусиятлари ҳамда олиб борилган реставрация ишлари ҳақида батафсил маълумот берилди.
