Эронда туркча исм қўйилган чақалоққа гувоҳнома берилмади
Оила судга мурожаат қилган бўлса-да, иш ҳали кўриб чиқилмаган.
“Free Iran” каналининг хабар беришича, Эроннинг Жулфа шаҳрида янги туғилган чақалоққа туркча исм қўйилгани боис туғилганлик гувоҳномаси расмийлаштирилмаган. Оила фарзандига Алихон исмини танлаган, бироқ Фуқаролик ҳолати далолатномаларини қайд этиш бўлими мазкур исмни тизимда мавжуд эмаслиги ва “турк-араб келиб чиқишли” экани сабабли рўйхатдан ўтказишни рад этган.
Чақалоқ 2 июн куни дунёга келган бўлса-да, орадан 85 кун ўтгач ҳам ҳужжатлар расмийлаштирилмаган. Шу сабабли болага эмлаш ва бошқа зарур тиббий хизматлар кўрсатишнинг имкони йўқ. Ота-оналар мазкур қарордан норози бўлиб судга мурожаат қилган, бироқ жараён ҳали бошланмаган.
Эслатиб ўтамиз, Эрон Президенти Масуд Пезешкиан аввалроқ туркча исмлар бўйича тақиқларни бекор қилишни топширган эди. Бунга озарбайжон турклари томонидан бошланган “Бобонинг исми” ва “Чақалоқ номи” каби акциялар сабаб бўлган. Мазкур ташаббуслар доирасида 15 мингдан ортиқ фуқаро петиция имзолаган ва туркча исмларга рухсат берилишини сўраган.
Шунга қарамай, айрим ҳудудларда ҳали ҳам туркча исмлар рўйхатга олинмаётгани кузатилмоқда.
