Шавкат Мирзиёев Хитойдaги ҳарбий парадда қатнашади
3 сентябр куни Пекинда Иккинчи жаҳон урушидаги ғалабанинг 80 йиллиги муносабати билан ҳарбий парад ва юбилей маросимлари ўтказилади.
3 сентябр куни Хитой Халқ Республикасининг пойтахти Пекин шаҳрида япон босқинчиларига қарши уруш ва Иккинчи жаҳон урушидаги ғалабанинг 80 йиллигига бағишланган тантанали маросим ҳамда ҳарбий парад бўлиб ўтади.
Хитой давлат ОАВлари хабарига кўра, ушбу тадбирда 26 нафар хорижий давлат раҳбарлари ва ҳукумат бошлиқлари иштирок этади. Улар қаторида Ўзбекистон Республикаси Президенти Шавкат Мирзиёев ҳам бор.
Юбилей муносабати билан Пекиннинг марказий Тянанмен майдонида Хитой армиясининг замонавий қирувчи самолётлари ва турли ҳарбий техникалари намойиши ўтказилиши режалаштирилган.
Маросимда Россия Федерацияси Президенти Владимир Путин, КХДР етакчиси Ким Чен Ин, Озарбайжон Президенти Илҳом Алиев, Қозоғистон Президенти Қосим-Жомарт Тоқаев ҳамда қатор Осиё ва Африка давлатлари раҳбарлари ҳам иштирок этади.
Тантанали тадбир Иккинчи жаҳон урушидаги умумжаҳон ғалабасини ёдга олиш ва халқлар ўртасидаги ҳамжиҳатлик рамзи сифатида ўтказилади.
