Айрим тоифадаги ИИО ходимлари ва оила аъзоларига уй берилади
Бу бўйича Ҳукуматнинг тегишли қарори эълон қилинди.
28 августдаги ҳукумат қарорига кўра, 2022 йил 4 июлгача хизмат муддатини тўлиқ ўтаб пенсияга чиққан ёки хизмат даврида касаллик сабаб резервга ёки истеъфога чиқарилган ички ишлар органлари пенсионерлари давлат ҳисобидан уй-жой билан таъминланади. Агар уларнинг номида шахсий тураржой бўлмаса, ушбу ҳуқуқ уларнинг оила аъзоларига ҳам тааллуқли.
Шунингдек, вафот этган ходимлар ва пенсионерларнинг оилалари ҳам шу имтиёздан фойдаланиши мумкин. Қарорга кўра, бериладиган уй-жойлар давлат ҳисобидан ажратилиб, тўлиқ уларнинг мулки сифатида расмийлаштирилади.
Мазкур тартиб ички ишлар тизимида узоқ йиллар хизмат қилган, аммо шахсий уй-жойга эга бўлмаган ходимлар ва уларнинг яқинларини ижтимоий қўллаб-қувватлашга қаратилган.
Қонунчиликка киритилган ушбу ўзгариш ички ишлар органларида хизматнинг нуфузини ошириш ва кадрларни ижтимоий жиҳатдан қўллаб-қувватлашда муҳим аҳамиятга эга.
