Шавкат Мирзиёев рафиқаси билан Тянжинда ўтказилган ШҲТ саммити тадбирларида қатнашди
Тадбирда ШҲТга аъзо ва кузатувчи давлатлар раҳбарлари ҳамда БМТ Бош котиби иштирок этди.
31-август куни Ўзбекистон Республикаси Президенти Шавкат Мирзиёев турмуш ўртоғи билан бирга Хитойнинг Тянжин шаҳридаги “Мейцзян” конгресс марказида ўтказилган Шанхай ҳамкорлик ташкилоти саммитининг норасмий тадбирларида иштирок этди.
Мазкур тадбирларда Хитой Халқ Республикаси Раиси Си Сзинпин, Россия Федерацияси Президенти Владимир Путин, Беларусь Республикаси Президенти Александр Лукашенко, Ҳиндистон Республикаси Бош вазири Нарендра Моди, Покистон Ислом Республикаси Бош вазири Шаҳбоз Шариф, Эрон Ислом Республикаси Президенти Масъуд Пезешкиан, Қозоғистон Республикаси Президенти Қасим-Жомарт Тоқаев, Қирғиз Республикаси Президенти Садир Жапаров, Тожикистон Республикаси Президенти Эмомали Раҳмон, Туркия Республикаси Президенти Раджаб Тоййиб Эрдоған, Туркманистон Президенти Сердар Бердимуҳаммедов, Озарбайжон Республикаси Президенти Илҳом Алиев, Мўғулистон Президенти Ухнаагийн Хурэлсух, шунингдек Миср, Камбоджа, Непал, Арманистон ҳукуматлари раҳбарлари ва БМТ Бош котиби Антониу Гутерриш ҳам қатнашди.
Ўзбекистон раҳбари ва турмуш ўртоғини Хитой Раиси Си Сзинпин ва унинг рафиқаси самимий кутиб олди. Тадбир якунида хорижий етакчиларга Шанхай ҳамкорлик ташкилотининг Тянжин саммитига бағишланган маданий дастур тақдим этилди.
