Ўзбекистоннинг ШҲТдаги ўрни тобора мустахкамланмоқда
Ўзбекистоннинг ШҲТдаги иштироки – тасодифий танлов эмас, балки стратегик жиҳатдан асосланган қарордир.
2025 йил 31 август – 1 сентябрь кунлари Ўзбекистон Республикаси Президенти Шавкат Мирзиёев Хитойнинг Тяньцзинь шаҳрида бўлиб ўтадиган Шанхай ҳамкорлик ташкилоти (ШҲТ) саммитида иштирок этди.
Саммит ва унга оид тадбирларда 20 дан ортиқ мамлакат раҳбарлари ҳамда 10 та халқаро ташкилот вакиллари қатнашди.
Ўзбекистон ШҲТни жаҳон сиёсат ва иқтисодиётида муҳим ўрин тутадиган нуфузли халқаро тузилма сифатида эътироф этди. Мамлакатимизнинг ташкилот фаолиятидаги иштироки миллий манфаатларга тўла мос келиб, хавфсизликни мустахкамлаш, иқтисодий ўсиш ва барқарор тараққиётни таъминлашга хизмат қилади.
Ўзбекистон ШҲТ асосчиларидан бири сифатида ташкилот доирасида фаол иштирок этиб, хавфсизлик, савдо-иқтисодий, инвестициявий, маданий-гуманитар ҳамкорлик ҳамда рақамлаштириш соҳаларида қатор ташаббусларни илгари сурди.
Хусусан, Ўзбекистоннинг фаол иштироки туфайли бир қатор муҳим механизмлар шаклланди, ташкилот фаолияти янада такомиллаштирилди. 2022 йилда Самарқандда бўлиб ўтган ШҲТ саммити бу йўналишда янги босқични бошлаб берди.
Ўзбекистон ШҲТ доирасида ҳамкорликни мустахкамлаш орқали прагматизм, миллий хусусиятларга ҳурмат ва барқарор тараққиётга интилиш асосида минтақавий ҳамкорликнинг янги стандартини қўллаб-қувватламоқда.
Шу маънода, Ўзбекистоннинг ШҲТдаги фаолияти – тасодифий танлов эмас, балки мамлакат хавфсизлиги, иқтисодий юксалиши ва барқарор тараққиётини таъминлашга қаратилган стратегик қарордир.
