Ўзбекистонга Финляндия Президенти ташрифи режалаштирилмоқда
Шавкат Мирзиёев ва Александр Стубб телефон мулоқоти чоғида ташриф тафсилотларини муҳокама қилди.
Ўзбекистон Республикаси яқин кунларда муҳим халқаро ташрифни қабул қилиши кутилмоқда. Финляндия Президенти Александр Стубб мамлакатимизга расмий ташриф билан келади.
Бу ҳақдаги келишув Шавкат Мирзиёев ва Александр Стубб ўртасида бўлиб ўтган телефон мулоқоти якунида эришилган натижаларда акс этди.
Ташриф доирасида ҳукуматлараро комиссия йиғилиши ўтказилиши, шунингдек, савдо-иқтисодий ҳамкорликни кенгайтиришга қаратилган қатор ҳужжатлар имзоланиши режалаштирилмоқда. Томонлар энергетика, яшил технологиялар, машинасозлик, логистика, экология, таълим ва илмий тадқиқотлар соҳаларида қўшма ташаббусларни муҳокама қилиши кутилмоқда.
Шу билан бирга, икки мамлакат етакчи компаниялари иштирокида йирик бизнес-форум ташкил этилиши кўзда тутилган. Унда қўшма лойиҳаларни амалга ошириш ва сармоявий шерикликни янада ривожлантириш истиқболлари муҳокама қилинади.
