Таълим тизимида ортиқча тадбирбозликка чек қўйилади
Маълум бўлишича, тадбирлар кўплиги ўқувчилар таълим олишига халал бермоқда.
Таҳлилларга кўра, Ўзбекистондаги таълим муассасаларида ўтказилаётган кўплаб тадбирлар номигагина, доимий такрорланадиган тарзда ташкил этилади. Уларнинг самарадорлигини баҳолаш бўйича замонавий ёндашувлар йўқ.
Айниқса, турли идора ва ташкилотлар томонидан келишилмаган тадбирлар кўплиги ўқувчилар таълим олишига халал бериб келади. Ўқувчи-ёшлар бўш вақтини мазмунли ўтказиш, истеъдодини юзага чиқаришда ягона вертикал тизим мавжуд эмас.
Эндиликда мазкур муаммолар инобатга олиниб, зарурат бўлмаган тадбирлар ўтказишнинг олди олинади. Бунинг учун “Маънавий-маърифий тадбирларнинг намунавий иш режаси” ишлаб чиқилди.
Мазкур режа асосида боғча ва мактабларда тартибли равишда маънавий-маърифий тадбирлар режали тарзда ўтказиш йўлга қўйилмоқда. Бошқа идора ва ташкилотларнинг умумий ўрта таълим мактабларида келишмаган ҳолда тадбирлар ўтказишга йўл қўйилмаслиги белгиланди.
