Шавкат Мирзиёев Қатар Амири билан телефон орқали мулоқот қилди
Ўзбекистон раҳбари Исроилнинг Доха шаҳрига қилган ракета ҳужумларини қоралаб, бундай ҳаракатлар халқаро ҳуқуққа зид эканини таъкидлади.
12 сентябр куни Ўзбекистон Республикаси Президенти Шавкат Мирзиёев Қатар Давлати Амири Шайх Тамим бин Ҳамад Ол Соний билан телефон орқали мулоқот қилди.
Суҳбат чоғида икки мамлакат ўртасидаги стратегик шериклик ва кўп қиррали ҳамкорлик муносабатларини янада ривожлантиришнинг долзарб масалалари кўриб чиқилди.
Давлатимиз раҳбари мулоқот аввалида яқинда Исроил томонидан Қатар пойтахти Доха шаҳрига уюштирилган ракета зарбаларини кескин қоралади. Қатарнинг мустақиллиги ва суверенитетини бузувчи, унинг хавфсизлигига таҳдид солувчи бундай ҳаракатлар халқаро ҳуқуқ меъёрларига ҳамда Бирлашган Миллатлар Ташкилоти Низомига зид экани алоҳида таъкидланди.
Ўзбекистон халқаро муносабатларда куч ишлатишнинг ҳар қандай шаклига қарши экани ва Яқин Шарқда вазиятнинг янада кескинлашувига йўл қўймаслик муҳимлиги қайд этилди.
Шу муносабат билан Президент Шавкат Мирзиёев Қатар ташаббуси билан чақирилаётган навбатдан ташқари араб-ислом саммити самарали ўтишини тилади.
Қатар Давлати Амири, ўз навбатида, кўрсатилган бирдамлик ва қўллаб-қувватлов учун чуқур миннатдорлик билдирди.
Мулоқот давомида икки давлат ўртасида фаол сиёсий мулоқотни давом эттириш, етакчи компаниялар ўртасида қўшма инвестиция ва кооперация лойиҳаларини жадаллаштириш масалалари ҳам муҳокама қилинди.
