Трамп Ўзбекистонга келиши мумкин
Марказий Осиёга ҳали ҳеч бир АҚШ президенти расмий ташриф билан келмаган эди.
АҚШ президенти Доналд Трампнинг Марказий Осиёга ташриф буюриши эҳтимоли юзасидан муҳокамалар кучаймоқда. 7 сентябрь куни Оқ уй ёнидан УС Опен теннис мусобақасига йўл олаётганда Трампга Қозоғистонга бориш режалари ҳақида савол берилганида, у “Эҳтимол. У яхши инсон, салом айтинг” дея жавоб қайтарган. Бироқ Трамп Қозоғистон ёки президент Қосим-Жўмарт Тўқаев номини аниқ тилга олмаган.
Шу билан бирга, 5 сентябрь куни Трамп ва Ўзбекистон президенти Шавкат Мирзиёев ўртасида телефон орқали суҳбат бўлиб ўтган эди. Унда Мирзиёев АҚШ президентини Ўзбекистонга “қулай вақтда” ташриф буюришга таклиф қилган. Вашингтондаги манбаларга кўра, ҳозирча Марказий Осиёга расмий сафар бўйича якуний қарор қабул қилинмаган.
Ўзбекистон Трампнинг иккинчи президентлик муддатида Оқ уй билан фаол мулоқот ўрнатишга интилаётган энг фаол давлат сифатида кўрилмоқда. Апрель ойида ташриф буюрган ташқи ишлар вазири Бахтиёр Саидов бошчилигидаги делегация Вашингтонга расмий таклиф топширган, Трамп эса Мирзиёев билан телефон орқали ҳам иқтисодий ҳамкорлик, хусусан, муҳим минераллар масаласини муҳокама қилган.
Қозоғистон ҳам АҚШ билан алоқаларни мустаҳкамлаш тарафдори бўлсада, айрим савдо масалаларида келишмовчиликлар сақланиб қолмоқда. Шу боис Трампнинг қисқа изоҳи қўшни давлат матбуотида катта муҳокамаларга сабаб бўлган бўлсада, унинг қайси мамлакатга сафар қилиши ҳануз ноаниқ.
Марказий Осиё ҳали ҳеч бир АҚШ президенти томонидан расмий сафар билан зиёрат қилинмаган ягона минтақа ҳисобланади. Агар Трамп ташрифни амалга оширса, у Франция, Германия ва Италия раҳбарларидан кейин минтақага йўл олган навбатдаги Ғарб етакчисига айланади.
