Ўзбекистон ва БМТ стратегик шерикликни янги босқичга олиб чиқади

23 сентябрь куни Нью-Йорк шаҳрида БМТ Бош Ассамблеясининг 80-сессияси доирасида Ўзбекистон Республикаси Президенти Шавкат Мирзиёев БМТ Бош котиби Антониу Гутерриш билан учрашув ўтказди.

 

Мулоқотда Барқарор ривожланиш мақсадларига эришиш бўйича миллий вазифалар доирасида БМТ билан ҳамкорликни кенгайтириш масалалари муҳокама қилинди. Президент Шавкат Мирзиёев Антониу Гутерришни БМТнинг юбилей сессияси билан табриклаб, ташкилот тизимини замонавий жараёнларга мос равишда ислоҳ қилиш ташаббусларини қўллаб-қувватлади.

 

Учрашувда Ўзбекистон ва БМТ ўртасидаги ҳамкорлик мисли кўрилмаган юқори даражага чиққанлиги таъкидланди. Бугунги кунда 160 дан ортиқ дастур ва лойиҳалар муваффақиятли амалга оширилмоқда. Яқин кунларда беш йиллик янги Ҳамкорлик дастури имзоланиши кутилмоқда.

 

Ўзбекистон ташаббуси билан БМТ Бош Ассамблеясининг 13 та резолюцияси қабул қилинган. Мамлакатимиз БМТнинг бир қатор нуфузли тузилмаларига – ECOSOC, Инсон ҳуқуқлари бўйича қўмита, Статистика комиссиясига аъзо этиб сайланди.

 

Шунингдек, 24 сентябрь куни БМТ бош қароргоҳида болалар саратони ва бошқа оғир касалликларга қарши курашиш бўйича юқори даражадаги форум ўтказилиши режалаштирилмоқда. Ўз навбатида, Самарқанд шаҳрида UNESCOнинг 43-Бош конференциясига ҳам қизғин тайёргарлик ишлари олиб борилмоқда.

 

БМТ Бош котиби Антониу Гутерриш Президент Шавкат Мирзиёевнинг Бош Ассамблеядаги нутқини юксак баҳолаб, унда илгари сурилган барқарор ривожланиш, сунъий интеллект, ёшлар, маданиятлараро мулоқот ва бошқа соҳалардаги ташаббусларнинг глобал аҳамиятини алоҳида қайд этди.

 

Учрашув якунида устувор йўналишларда кенг кўламли шерикликни ривожлантириш, ҳамкорликнинг янги дастур ва лойиҳаларини ишлаб чиқиш бўйича келишувга эришилди.