Нью-Йоркда Зироат Мирзиёева ЖССТ Бош директори билан учрашув ўтказди

Нью-Йорк шаҳрида Ўзбекистон Республикаси Биринчи хоними Зироат Мирзиёева раислигида “Саратонига ва бошқа хавфли касалликларга чалинган болаларнинг яшовчанлигини ошириш ҳамда азоб-уқубатларини камайтириш бўйича глобал ҳаракат” мавзусида юксак даражадаги форум бўлиб ўтди.

 

Мазкур тадбир БМТ Бош Ассамблеяси доирасида Жаҳон соғлиқни сақлаш ташкилоти (ЖССТ) ва “St. Jude” болалар тадқиқот шифохонаси ҳамкорлигида ўтказилди. Бу Ўзбекистон тарихида илк бор жаҳон миқёсида соғлиқни сақлашнинг долзарб масаласига бағишланган форум бўлиб, кўплаб давлатлар, халқаро ташкилотлар ва экспертлар эътиборини тортмоқда.

 

Тадбирда дунёнинг турли минтақаларидан биринчи хонимлар – Туркия, Озарбайжон, Ангола, Вьетнам, Гватемала, Сербия президентлари рафикалари ҳамда бошқа юқори мартабали меҳмонлар иштирок этди. Зироат Мирзиёева жаҳон ҳамжамиятини саратонига чалинган болаларнинг ҳаёт сифатини яхшилаш йўлида янада фаол чоралар кўришга чақирди.

 

Шунингдек, Зироат Мирзиёева ЖССТ Бош директори доктор Тедрос Адхан Гебрейесус билан учрашув ўтказди. Суҳбат чоғида Ўзбекистоннинг болаларни саратонига қарши дори воситалари билан таъминлашга оид глобал ташаббусни қўллаб-қувватлаётгани алоҳида қайд этилди. Томонлар болалар саратонини эрта аниқлаш, замонавий диагностика ва даволаш усулларини жорий этиш, мутахассисларни тайёрлаш ва қайта тайёрлаш, шунингдек, болалар ва уларнинг оилаларига реабилитация ҳамда психологик ёрдам кўрсатиш имкониятларини кенгайтиришга келишиб олдилар.

 

ЖССТ раҳбари Ўзбекистоннинг соғлиқни сақлаш соҳасидаги ташаббуслари ва “Замин” фондининг муҳим ижтимоий ҳамда экологик лойиҳаларини юксак баҳолади.