Душанбеда Шавкат Мирзиёев ва Эмомали Раҳмон учрашуви бўлиб ўтди
Учрашувда икки томонлама ҳамкорлик истиқболлари, минтақавий хавфсизлик ва бўлажак халқаро саммитларга тайёргарлик масалалари муҳокама этилди.
Душанбе шаҳрида Ўзбекистон Республикаси Президенти Шавкат Мирзиёев Тожикистон Республикаси Президенти Эмомали Раҳмон билан учрашуви бўлиб ўтди.
Суҳбат аввалида Ўзбекистон раҳбари Тожикистон Президентни Мустақил Давлатлар Ҳамдўстлигига раислик фаолияти натижалари билан самимий табриклаб, “Марказий Осиё – Россия” форматидаги бўлажак учрашув ҳамда МДҲ саммитининг муваффақиятли ўтишини тилади.
Мулоқот чоғида Ўзбекистон ва Тожикистон ўртасидаги дўстлик, яхши қўшничилик, стратегик шериклик ва иттифоқчилик алоқаларини янада мустахкамлашга қаратилган долзарб масалалар кўриб чиқилди.
Томонлар ўзаро ҳамкорликнинг изчил ривожланиб бораётганини мамнуният билан қайд этдилар. Савдо ҳажми, юк ташиш кўрсаткичлари ҳамда авиақатновлар сони ортиб бораётгани таъкидланди.
Учрашувда ўзаро савдони янада кенгайтириш, саноат, энергетика, қишлоқ хўжалиги ва бошқа устувор йўналишларда қўшма лойиҳаларни илгари суриш бўйича мувофиқлаштирилган чораларни амалга ошириш муҳимлиги қайд этилди.
Шунингдек, фаол маданий-гуманитар алоқалар ва ҳудудлараро ҳамкорликни давом эттириш масалаларига алоҳида эътибор қаратилди.
Учрашув якунида Президентлар халқаро ва минтақавий аҳамиятга эга масалалар юзасидан ҳам фикр алмашдилар, жумладан, жорий йил ноябрь ойида Тошкентда ўтказилиши режалаштирилган Марказий Осиё давлатлари раҳбарларининг Маслаҳат учрашувига тайёргарлик жараёнлари муҳокама қилинди.
