Шавкат Мирзиёев ва Белгия Қироли Филлип Брюсселда музокара ўтказди

Брюссел шаҳрига расмий ташриф доирасида Ўзбекистон Республикаси Президенти Шавкат Мирзиёев Белгия Қироллиги Қироли Филлип билан Лакен саройида учрашув ўтказди.

 

Суҳбат чоғида Ўзбекистон ва Белгия ўртасидаги савдо-иқтисодий, инвестициявий ҳамда маданий-гуманитар ҳамкорликни янада ривожлантириш масалалари муҳокама қилинди. Шунингдек, халқаро ва минтақавий аҳамиятга эга долзарб масалалар юзасидан ҳам фикр алмашилди.

 

Қирол Филлип Ўзбекистон раҳбарининг Европа Иттифоқи раҳбарияти билан музокаралари натижаларини юқори баҳолаб, Кенгайтирилган шериклик ва ҳамкорлик тўғрисидаги тарихий битим имзолангани муносабати билан самимий табрик сўзларини билдирди.

 

Учрашувда икки давлат ўртасидаги муносабатларнинг изчил ривожланиб бораётгани, вазирлар даражасида фаол мулоқотлар йўлга қўйилгани, сиёсий маслаҳатлашувлар мунтазам ўтказилаётгани ва парламентлараро дўстлик гуруҳлари фаолият юритаётгани қайд этилди.

 

Маданий-гуманитар соҳада ҳамкорлик мустаҳкамланиб бормоқда. Тошкент–Кортрейк ва Самарқанд–Льеж шаҳарларида биродарлик алоқалари ўрнатилган, Кортрейк шаҳрида буюк аллома Абу Али ибн Сино бюсти очилган.

 

Белгия компаниялари Ўзбекистонда тўқимачилик, логистика ва хизмат кўрсатиш соҳаларида фаолият юритмоқда. Ўтган йили Тошкентда Бенилюкс мамлакатлари савдо палатаси иш бошлади.

 

Томонлар яқин келажакда Белгия ишбилармонлари делегациясининг Ўзбекистонга ташрифини ташкил этиш ҳамда маданий алмашинув дастурларини кенгайтириш зарурлигини таъкидладилар.

 

Учрашув якунида Президент Шавкат Мирзиёев Қирол Филлипни расмий ташриф билан Ўзбекистонга келишга таклиф этди.