Финляндия Президенти Ислом цивилизацияси марказига ташриф буюрди
Марказнинг 1000 га яқин лойиҳасидан 400 таси хорижий ҳамкорлар билан амалга оширилмоқда.
Финляндия Республикаси Президенти Александр Стубб Ўзбекистон Президенти Шавкат Мирзиёевнинг таклифига биноан амалга ошаётган мамлакати ташрифи доирасида Ўзбекистондаги Ислом цивилизацияси марказига борди. Олий мартабали меҳмонни марказ раҳбарияти ва олимлар кутиб олиб, мажмуанинг жаҳон илм-фани ва ислом оламидаги аҳамияти ҳақида батафсил маълумот беришди.
Марказ экспозицияларида намойиш этилаётган 1000 га яқин лойиҳаларнинг 400 дан зиёди хорижий ҳамкорлар билан биргаликда амалга оширилаётганлиги, бу эса дунё олимларини илмий тадқиқотлар сари жалб қилаётгани ва бирлаштираётгани қайд этилди.
Финляндия Президенти музей ва кўргазма заллари билан алоҳида қизиқиб, Ўзбекистоннинг маданий мероси жаҳонда қандай даражада бебаҳо эканлигини эътироф этди. У марказда яратилган муҳитда ҳар бир саҳна ва ҳар бир ёритилган тафсилотнинг ўзига хос эканлигини таъкидлаб, “Ростини айтганда, бу ерда мен беқиёс таассуротлар гирдобига тушиб қолдим. Ҳар бир экспозиция, ҳар бир зал, ҳар бир деталь чуқур ўйланган. Уч минг йиллик тарихни бугунги авлодга шу даражада замонавий шаклда етказиб бериш – бу юқори санъат ва буюк маҳорат талаб этади”, деди.
Стубб марказ нафақат ўтган асрлар меросини қайта жонлантирган, балки келажак авлод учун ҳам илҳом манбаига айланганлигини, айниқса интерактив намойишлар ва инновацион технологиялар ёшларни ўзига жалб этаётганини таъкидлади.
