Шавкат Мирзиёев ЮНЕСКО Бош директори Одри Азуле билан учрашув ўтказди
Учрашув якунида Одри Азуле “Дўстлик” ордени билан тақдирланди.
Самарқанд шаҳрида Ўзбекистон Республикаси Президенти Шавкат Мирзиёев БМТнинг Таълим, фан ва маданият масалалари бўйича ташкилоти ( ЮНЕСКО) Бош директори Одри Азулени қабул қилди. Учрашув давомида Ўзбекистон билан ЮНЕСКО ўртасидаги кўп қиррали шерикликни янада ривожлантириш масалалари муҳокама қилинди.
Одри Азуле Ўзбекистон раҳбарини ЮНЕСКО Бош конференциясининг 43-сессиясини сўнгги 40 йилда илк бор ташкилотнинг Париждаги бош қароргоҳи ташқарисида юқори даражада ташкил этгани билан табриклади. Конференция доирасида ЮНЕСКОнинг Мактабгача таълим бўйича минтақавий маркази ишга туширилиши, Беруний мукофоти ғолибларини тақдирлаш маросими, Самарқанд шаҳрининг 3000 йиллиги муносабати билан махсус тадбир, шунингдек, музейлар, сунъий интеллект ва гендер мавзулари бўйича форумлар ўтказилиши режалаштирилган.
Сўнгги йилларда Ўзбекистон ва ЮНЕСКО ўртасидаги ҳамкорлик сезиларли даражада ривожланди. Биргаликда болалар таълими бўйича бутунжаҳон конференцияси ўтказилди, Парижда Берунийнинг 1050 йиллиги нишонланди ва буюк аллома шарафига халқаро мукофот таъсис этилди. Ўзбекистоннинг ташаббуси билан ЮНЕСКОнинг учта муҳим резолюцияси қабул қилинди, шунингдек, ташкилотнинг махсус рўйхатларига Ўзбекистоннинг бир қатор янги объектлари ва маданий қадриятлари киритилди.
Учрашув якунида Президент Шавкат Мирзиёев Одри Азулега фан, таълим ва маданият соҳаларидаги алоқаларни ривожлантиришдаги хизматлари ҳамда халқимизнинг бой маданий меросини кенг оммалаштиришга қўшган ҳиссаси учун “Дўстлик” орденини топширди.
