Шавкат Мирзиёев 3–4 ноябрь кунлари амалий ташриф билан Қатарга боради

Ўзбекистон президенти Шавкат Мирзиёев 3–4 ноябрь кунлари амалий ташриф билан Қатар давлатига боради. Давлат раҳбари Доха шаҳрида ўтказиладиган Ижтимоий ривожланиш бўйича II Жаҳон саммитида иштирок этади, дейилади Президент матбуот хизмати хабарда.

 

Мазкур нуфузли форум Қатар амири Шайх Тамим бин Ҳамад Ол Соний ташаббуси ва таклифи билан ташкил этилмоқда. Ташриф доирасида халқаро ҳамкорликни кенгайтириш, ижтимоий тенгсизликларни камайтириш, барқарор ривожланиш ва инклюзивликни таъминлашга доир долзарб масалалар муҳокама қилинади.

 

Саммит кун тартибидан қуйидаги масалалар ўрин олган:

 

• ижтимоий-иқтисодий ривожланишда фарқларни камайтириш,

 

• Копенгаген декларацияси тамойилларига содиқликни мустаҳкамлаш,

 

• 2030 йилгача Барқарор ривожланиш мақсадларига эришиш жараёнини жадаллаштириш,

 

• миллий стратегияларни такомиллаштириш, ижтимоий адолат, инклюзивлик ва жамият барқарорлигини ошириш бўйича комплекс ташаббусларни амалга ошириш.

 

Форум давлатлар, халқаро ташкилотлар, БМТ институтлари, нодавлат сектор, экспертлар ва бизнес вакилларини бир платформада жамлаб, конструктив мулоқотни кучайтиришга хизмат қилади.

 

Саммит якунида инклюзив ижтимоий тараққиёт бўйича глобал ҳамкорликни кучайтиришга қаратилган Доха декларацияси қабул қилиниши режалаштирилган.