“Мен адолат сўраяпман” — Гулираъно Қосимова Саида Мирзиёевадан ёрдам сўрамоқда
Фурқат туманидаги мактаб директори ИИБ ва Солиқ бошлиқлари муносабати қурбони бўлган эди. Иши ёпиқ судда босим билан кўрилаётган аёл йиғлаб мурожаат билан чиқди.
Фарғона вилояти Фурқат туманидаги 29-сонли умумтаълим мактаби директори Гулираъно Қосимова суд ишида жабрланувчи сифатида иштирок этаётгани ва бу жараёнда ўзини адолатсиз муносабат қурбони сифатида ҳис қилаётганини жамоатчиликка маълум қилди.
Қосимованинг таъкидлашича, у ишда жабрланувчи сифатида қатнашса-да, судда унга айбловчи сифатида муносабат қиляпти, ҳатто суд залидан чиқариб юборилганини ҳам сўзлаб берди. Шу сабабли у ички ишлар ходимлари ва юқори лавозимли мансабдор шахсларга мурожаат қилиб, ишни очиқ ва адолатли суд муҳокамаси орқали кўриб чиқишни талаб қилмоқда.
Гулираъно Қосимованинг таъкидлашича, суд жараёнида унга нисбатан ҳақоратли муносабат кузатилган.
“Судда мени ҳақорат қилишгача ўтяпти. Мен бу ҳолатдан норози бўлиб раддия бердим, аммо суд буни қабул қилмади”, — дейди у.
Судда адвокатларнинг телефонлари ҳам йиғиб олинаётгани ҳақида айтади.
“Суд ёпиқ бўлса, ОАВ ходимлари кирмаса, адвокатларнинг телефони олиб қўйилса, эътироз билдириш ҳуқуқимиз чекланса — унда суднинг ёпиқ ўтишидаги мақсад нима?” — дея сўрайди у.
Қосимова, шунингдек, суд мажлисида унга босим ўтказилаётганини ҳам таъкидлади:
“Гувоҳ сифатида берган кўрсатмаларимда судья гапимни бўлиб, ‘эслай олмайсизми, эслолмаётган экансиз, деб менга йўналтиришлар бермоқда. Бу ҳолат адолатли жараёнга халақит бераяпти”, — дейди ўз шаъни ва қадр-қиммати учун курашаётган аёл.
“Мен курашяпман — фақат ўзим учун эмас, барча аёллар учун. Мендан кейин ҳеч бир аёл шундай таҳқирга учрамасин”, — деди директор.
Гулираъно Қосимова айбдорлар жавобгарликка тортилишидан олдин бу йўлдан чекинмаслигини, ҳақиқат ва адолат тиклангунига қадар курашни давом эттиришини билдирди.
“Суд очиқ бўлмаса, адолат ҳам йўқ”
Қосимова суд жараёнидаги адолатсизлик ва босим ҳолатларига расман эътироз билдириб, ишни Олий судда оммавий ахборот воситалари иштирокида кўриб чиқишни сўрамоқда.
"Ишни Олий судда кўришсин, очиқ муҳокама бўлсин. Суд очиқ бўлмаса — адолат ҳам бўлмайди”, — деди у.
Директорнинг фикрича, очиқ суд жараёни орқали жамоатчилик ҳақиқатни ўз кўзи билан кўриши ва ҳар бир иштирокчининг ҳақиқий ҳаракатини билиши мумкин бўлади.
Гулираъно Қосимова суд жараёнидаги босим, далиллар инобатга олинмаётгани ва тергов жараёнидаги камчиликлар сабабли Президент Администрацияси раҳбари Саида Мирзиёева ҳамда Олий Мажлис Сенати раиси Танзила Норбоевага мурожаат қилди.
“Илтимос, Саида Шавкатовна, мана шу видеомурожаатни кўрсангиз, ёрдам беринг. Мен адолат сўраяпман”, — деди у.
Шунингдек, директор бошқа масъул раҳбарлар ва жамоатчилик вакилларига ҳам ўз далил ва ҳужжатларини тақдим этишга тайёрлигини билдирди.
“Раҳбарим принципиал инсон, адолатни қадрлайди”
Гулираъно Қосимова Фарғона вилояти мактаб таълими бошқармаси бошлиғи Шерзод Долимов томонидан кўрсатилган ҳуқуқий ва маънавий қўллаб-қувватловни алоҳида таъкидлади:
“Менинг раҳбарим принципиал инсон. У биринчи навбатда аниқлик ва адолатни қадрлайди”, — дейди мактаб директори.
Гулираъно Қосимованинг иши мамлакат суд-ҳуқуқ тизимида шаффофлик ва адолатни таъминлаш йўлидаги муҳим синов сифатида баҳоланмоқда. Унинг мурожаатлари ва жамоатчиликка қилган чиқишлари жабрланувчилар ҳуқуқини ҳимоя қилиш, суд жараёнларида очиқлик ва жавобгарликни таъминлаш борасида долзарб масалаларни кўтармоқда.
Фарғона суд залида кечаётган бу жараён — ҳақиқат билан жасорат, виждон билан мансаб тўқнашган майдон. Гулираъно Қосимова бу майдонда ёлғиз бўлиши мумкин, аммо ортида халқнинг кўзи, одамларнинг адолатга бўлган умид турибди.
Бу суднинг натижаси нафақат бир инсон тақдирини, балки бутун тизимга бўлган ишончни белгилайди.
Мўътабар Нурмуҳаммедова
