Шавкат Мирзиёев ва Қасим-Жомарт Тоқаев ўртасида тор доирада муҳим музокара бўлиб ўтди

15 ноябрь куни Кўксарой қароргоҳида Ўзбекистон Республикаси Президенти Шавкат Мирзиёев ва Қозоғистон Республикаси Президенти Қасим-Жомарт Тоқаев ўртасида тор доирадаги музокаралар бўлиб ўтди.

 

Суҳбат чоғида Қозоғистон Президентининг давлат ташрифи Ўзбекистон ва Қозоғистон ўртасидаги стратегик шериклик ҳамда иттифоқчилик муносабатларини янги босқичга олиб чиқиши таъкидланди.

 

Ташрифга тайёргарлик жараёнида Тошкентда Ҳукуматлараро комиссия йиғилиши, бизнес форуми, “Қозоғистон тиббиёти кунлари”, қозоқ фильмлари намойиши, Остона кунлари ва бошқа маданий-маърифий тадбирларнинг муваффақиятли ўтказилгани мамнуният билан қайд этилди.

 

Музокараларда ўзаро савдо ҳажмини жадал ошириш зарурлиги алоҳида қайд этилди. Жорий йилнинг ўтган даври мобайнида товар айирбошлаш 4 миллиард долларга етгани, импорт ўрнини босиш ва янги лойиҳалар орқали бу кўрсаткични 10 миллиард долларга етказиш режалаштирилгани билдирилди. Юк ташиш ҳажми барқарор ўсиб бормоқда, икки давлат ўртасида ҳафтасига 40 дан ортиқ авиақатнов амалга оширилмоқда.

 

Сўнгги йилларда 6,5 мингга яқин қўшма корхона ташкил этилгани, саноат кооперацияси йўналишида катта ҳажмдаги йирик лойиҳалар бошланганини инобатга олиб, умумий қиймати 8 миллиард доллардан ортиқ бўлган янги лойиҳа портфели шакллантирилгани маълум қилинди. Ушбу ташаббусларни қўллаб-қувватлаш мақсадида қўшма инвестиция платформасини ишга тушириш таклифи илгари сурилди.

 

Музокаралар давомида энергетика, транспорт, кимё саноати, қишлоқ хўжалиги, сув хўжалиги, экология, рақамли технологиялар ва бошқа муҳим йўналишларда ўзаро манфаатли ҳамкорликни чуқурлаштириш масалалари кўриб чиқилди.

 

Шунингдек, ҳудудлараро ҳамкорликни кенгайтириш муҳимлиги таъкидланиб, икки мамлакат ҳудудлари раҳбарларининг биринчи Кенгашини 2026 йилда Қозоғистонда ўтказиш бўйича келишувга эришилди.

 

Давлат раҳбарлари минтақавий ва халқаро кун тартибидаги долзарб масалалар юзасидан ҳам фикр алмашдилар.