Кўксаройда Ўзбекистон ва Туркманистон раҳбарлари ўртасида тор доирадаги музокаралар бўлиб ўтди
Учрашувда Хива шаҳрида учинчи Ҳудудлар форумини ўтказиш бўйича келишувга эришилди.
17 ноябрь куни Кўксарой қароргоҳида Ўзбекистон Республикаси Президенти Шавкат Мирзиёев ва Туркманистон Президенти Сердар Бердимуҳамедов ўртасида тор доирадаги музокаралар бўлиб ўтди. Томонлар Ўзбекистон – Туркманистон дўстлик, яхши қўшничилик ва стратегик шериклик муносабатларини янада ривожлантириш ва мустаҳкамлаш зарурлигини таъкидлади.
Сўнгги йилларда икки давлат ўртасидаги алоқалар ижобий суръатларда давом этмоқда. Ҳукуматлараро комиссия ва Ишбилармонлар кенгаши йиғилишлари, шунингдек маданий тадбирлар мунтазам ўтказилиб келмоқда. Ташриф арафасида Урганч ва Тошкент шаҳарларида ўтказилган Туркманистон маданияти кунлари ҳамда фильмлари намойишлари иштирокчиларда катта таассурот қолдирди.
Савдо ва иқтисодий алоқалар ҳам фаол ривожланмоқда. Ўтган йили товар айирбошлаш ҳажми 1 миллиард доллардан ошди, юк ташиш ҳажми ортиб бормоқда ва Туркманбоши портидан фойдаланиш фаолияти кучайди. Музокараларда ўзаро савдони ошириш ҳамда саноат, энергетика, транспорт, машинасозлик, қишлоқ ва сув хўжалиги соҳаларида самарали кооперацияни кенгайтириш масалаларига алоҳида эътибор қаратилди.
Ҳудудлараро алмашинувларни ривожлантириш ҳам муҳимлиги таъкидланди. Шу муносабат билан Хива шаҳрида учинчи Ҳудудлар форумини ўтказиш бўйича келишувга эришилди. Шунингдек, минтақавий ва халқаро аҳамиятга молик масалалар юзасидан ҳам фикр алмашилди.
