Ўзбекистон ва Туркманистон делегациялари ўртасида кенгайтирилган музокаралар ўтказилди

 

17 ноябрь куни Кўксарой қароргоҳида Ўзбекистон Республикаси Президенти Шавкат Мирзиёев ва Туркманистон Президенти Сердар Бердимуҳамедовнинг кенгайтирилган таркибдаги музокаралари бўлиб ўтди. Учрашувда икки мамлакат расмий делегациялари иштирок этди. Президентимиз Туркманистон Президентининг давлат ташрифини икки халқ ўртасидаги кўп асрлик дўстлик ва яхши қўшничилик ришталарининг мустаҳкамлигидан далолат берувчи муҳим воқеа сифатида баҳолади.

 

Томонлар Ўзбекистон – Туркманистон дўстлик, яхши қўшничилик ва стратегик шериклик муносабатларини янада кенгайтириш, шунингдек савдо, транспорт, энергетика, сув хўжалиги ва бошқа соҳаларда амалга оширилган ишларга юқори баҳо берди. Шу билан бирга, ўзаро савдо ҳажми сўнгги йилларда икки бараварга ошиб, 1 миллиард доллардан ошганлиги қайд этилди ва маҳсулот турини кенгайтириш орқали бу кўрсаткични 2 миллиард долларга етказиш имкониятлари таъкидланди.

 

«Шовот-Тошҳовуз» чегараолди савдо зонасининг ишга туширилиши товар айирбошлашни кўпайтиришга хизмат қилиши ва бу тажрибани «Олот-Фараб» ҳудудида ҳам татбиқ этиш бўйича келишувга эришилгани қайд этилди. Саноат кооперациясини кенгайтириш доирасида қурилиш материаллари, фармацевтика, озиқ-овқат маҳсулотлари ва бошқа талаб юқори бўлган товарларни ишлаб чиқаришга бизнесни жалб қилиш муҳимлиги таъкидланди.

 

Энергетика соҳасида ўзаро манфаатли ҳамкорлик йўлга қўйилган, истиқболли конларни биргаликда ўзлаштириш бўйича келишувлар амалга оширилмоқда. Транспорт соҳасида юк ташиш ҳажми ошиб бораётгани, божхона-логистика тартиблари соддалаштирилгани, Туркманбоши портини ривожлантириш ва пойтахтлар ўртасида тўғридан-тўғри авиақатновларни тиклашга келишилган.

 

Эришилган келишувларнинг ўз вақтида амалга оширилишини таъминлаш мақсадида йил охиригача Ҳукуматлараро комиссия ва Ишбилармонлар кенгашининг навбатдаги йиғилишлари ўтказилади. Томонлар гуманитар соҳа ва маданий алмашинувларни ривожлантиришни давом эттириш, Урганч ва Тошкентда Туркманистон маданияти кунлари ҳамда туркман фильмлари намойишларини амалга ошириш, концертлар ва театр ижодий сафарларини мунтазам ўтказиш, Хивада Ёшлар форумини ташкил этиш ва биргаликда фильмлар ишлаб чиқариш амалиётини давом эттиришга келишиб олдилар.

 

Соғлиқни сақлаш ва тиббиёт соҳаларидаги ҳамкорлик ҳам фаоллашади. Музокаралар якунида давлат раҳбарлари эришилган барча келишувларни амалга ошириш бўйича кенг қамровли “йўл харитаси”ни қабул қилиш ва масъулларга топшириқ беришларини маълум қилдилар.